Tag Archives: 第二家園

余氏一家三口申請馬來西亞「第二家園」計劃（下稱MM2H），開宗明義不是逆權逃兵，早年已密謀投資移民，覺得全球一體化、香港樓價高、生活指數高，同樣價錢是其他國家可以換來更好享受。雨傘運動是其中一個催化劑，預算300萬至400萬元走出香港。他說有人覺得台灣好，但他們覺得將來與香港前途一樣，紐西蘭就被拒諸門外，最終選擇馬來西亞，因為門檻低，定存15萬元還有4厘息口。香港是我家？「去到邊，生存到，開心嘅，每個地方都係家。」MM2H當是保障下一代，買條後路給余家，最新余生一家三口的申請已獲批。 做貿易小生意的余生10年前打算移民，不過當時忙於公司業務未有實際行動，「近年年紀大，諗一諗，有無一個地方可以作為棲身之所。香港樓價貴，生活指數高，同外國比，錢係用咁多，但未必有咁嘅回報同享受。香港是我家？我哋無諗㗎啦，去到邊，生存到，開心嘅，每個地方都係家。行行企企，唔係咁自在，邊個家都無用喇！」 他不諱言，雨傘運動是其中一個催化劑，「做人做事，要諗多樣嘢，保一保障」，「移民睇長線，唔係一時三刻。唔一定成個人揼晒過去，投資晒落去。就算唔係好有錢，或者有少少嘅，可以將啲嘢搬啲過去。全球一體化，你可以將啲嘢分散吓。你覺得好嘅嘢，你仔女未必覺得好，如果有機會再有下一代（孫），佢覺得香港真係唔好。前人唔做，後人去做，如果後人未必做得到，當問題到，就麻煩。始終攞多個保障好啲、著數啲，唔係放棄呢度。我哋都係香港出世，香港長大。又唔會話走，唔返來嘅。（為自己買條後路？）可以咁講。」聽到老公堅持移民，余太表示，初期不太接受，「我係香港人，根在香港。」 幾年前着手行動，預算300萬至400萬港元，台灣、泰國、紐西蘭都曾是目標之一，「台灣，始終政治敏感度高，唔知台灣同內地關係會點。就算揸住台灣護照……」余太接着說：「等於香港，無分別！」余生補充：「好坦白，邦交國越來越少，你唔知廿年、卅年後，再下一代佢揸台灣護照仲慘過揸其他國家護照。有啲人覺得台灣ok，人人睇法唔同，我哋就無諗台灣。」余太又接着講到他們申請紐西蘭移民，「係非常非常之難，好複雜，乜都pass晒，嗰邊（紐西蘭）唔批就唔批。見到我哋香港人同中國人就更加敏感，總之你係香港人都當係中國人，更加機會低啲。」 余生說：「馬來西亞第二家園計劃好寬鬆，唔使揼咁多本錢。」他倆還到吉隆坡實地考察，「去之前覺得無咁先進，無咁多高樓大廈，去完之後第二個感覺。同深圳比較，設施較完善，睇到馬來西亞就好似80年代香港經濟起飛年代，好多高樓大廈起緊，四季如夏，唔驚冰天雪地。」 他們育有一名女兒，因為已年滿21歲，亦替她申請這個計劃，「攞多1個戶籍都係一種保障，當多一條出路。就算你買一層樓畀佢，皇宮咁靚，佢唔鐘意香港都無用。」6月至今逆權運動，余太感到香港變了，余生說：「呢個情況，無得預會去到邊，去到幾差。做人兩手準備囉！好似樓市咁，跌無人買、升有人追，移民唔係多錢少錢，等於買保險，唔係諗住今日買，聽日賠。我就睇得好化，啱唔啱，唔敢直接講。精神上支持，支持咩唔想直接講。唔想一個地方有咩影響，最好以和為貴。有時好多嘢我哋唔知有咩變遷，唔係我哋可以話到事。只可以見到好與唔好，自己分析衡量，唔係去到最尾先做。到時唔係唔得，辛苦啲，倉卒啲。」 第二家園計劃入場門檻低，以50歲作為分水嶺（過了50歲生日當作以上），50歲及以上申請人需要提供財務證明，包括流動資產35萬元馬幣（約70萬港元）及每月收入1萬馬幣（約2萬港元），49歲及以下所提供財務證明為流動資產50萬馬幣（約100萬港元）及每月收入1萬馬幣（約2萬港元）。經過財務證明批准後，申請人需要體檢、購買醫療保險及銀行定期存款，50歲及以上要求定存15萬馬幣（約30萬港元），49歲及以下要求定存30萬馬幣（約60萬港元）。通過財務需求後，申請者可獲多次入境社交簽證，期限10年，簽證可無限期續簽。申請者可攜帶配偶、年齡21歲以下的未婚孩子及60歲以上的父母，注意60歲以上的父母是指申請者父母，而不包括配偶的父母。至於申請者獲批簽證1年後，可從要求定存當中提取15萬馬幣（約30萬港元）用作買樓、買車、子女教育及醫療開支，但期間定存必須保留至少15萬馬幣（約30萬港元）。余生表示，當地定期存款年息近4厘。 目前余生在吉隆坡購入2個單位，其中一個單位約200萬港元，面積約1,000方呎，「你唔係去一個地方希望住大住細，你係去一個地方，你自己容納，開唔開心先。你唔開心，住邊都無用。」「第二家園」只是予申請者在馬來西亞暫住，不容許在當地受僱工作，他認為：「有得工作就唔係第二家園。門檻條件輕鬆，政策就唔會咁好福利。好多歐美國家，第一步都係畀你暫居。去到一個地方，你唔好貪心拎個護照，拎護照係另一件事。融入到地方，唔好麻煩到人。福利，睇你自己，有人貪福利移民。我求容納到就覺得OK，好多嘢唔可以計得咁多。」 人離鄉賤，被問會否擔心馬來西亞發生「排華」事件，余生回應：「完全正確，亦都有排華，我都有憂慮。但每個地方都有機會變好定唔好。我係外國人，去到當地，唔去攝入當地政治，基本上我哋無問題。如果當地經濟政治有咩問題，我哋都控制唔到。只要你，或者我本人，去個地方，唔好成盤雞蛋掟晒落去，慢慢逐步試，投石問路。」